సర్కారీ కుర్చీలపై తెల్ల టవల్... దాని వెనుక కథేంటి?

ప్రభుత్వ కార్యాలయాల్లో అధికారుల కుర్చీలపై కనిపించే తెల్ల తువాలు గురించి సోషల్ మీడియాలో మరోసారి ఆసక్తికర చర్చ మొదలైంది. బ్రిటిష్ కాలం నాటి ఈ సంప్రదాయం నేటికీ ఎందుకు కొనసాగుతోందంటూ ఐఐటీ ఢిల్లీ పూర్వ విద్యార్థి కేతన్ పెట్టిన ఓ పోస్టుతో ఈ చర్చ రాజుకుంది. దీనిపై మాజీ అధికారులు, సామాన్యులు స్పందిస్తూ తమ అభిప్రాయాలను పంచుకుంటున్నారు.

ఈ సంప్రదాయం వెనుక ఉన్న కారణాలను మాజీ అధికారి గుర్దీప్ సింగ్ సప్పల్ వివరించారు. ఏసీలు, సరైన రోడ్లు లేని రోజుల్లో అధికారులు గుర్రాలపై ప్రయాణించేవారని, వారి చెమటతో కుర్చీలు పాడవకుండా ఉండేందుకు ఈ టవల్స్ వాడేవారని తెలిపారు. "బ్రిటిషర్లు వెళ్ళిపోయారు, గుర్రాలనూ పంపేశారు, కానీ ఆ టవల్స్ మాత్రం ఉండిపోయాయి" అని ఆయన చమత్కరించారు. ఏసీలు వచ్చినా ఈ పద్ధతి మారకపోవడం గమనార్హం.

ఈ అధికార దర్పం కేవలం టవల్స్‌కే పరిమితం కాలేదని సప్పల్ తెలిపారు. అధికారి హోదాను బట్టి టేబుల్ సైజు కూడా నిర్ణయిస్తారని, తాను చిన్న టేబుల్ కావాలని కోరినా సిస్టమ్ అంగీకరించలేదని గుర్తుచేసుకున్నారు. అలాగే, జూనియర్ అధికారులు నీలం లేదా నలుపు ఇంక్ మాత్రమే వాడాలని, జాయింట్ సెక్రటరీ స్థాయి అధికారులు ఎరుపు లేదా ఆకుపచ్చ ఇంక్ వాడవచ్చనే నిబంధనలు ఉన్నాయని పేర్కొన్నారు. ఈ ఇంక్ రంగుపై ఓసారి 13 నెలల పాటు విచారణ జరిగిందని వివరించారు. మరో మాజీ అధికారి ఆశిష్ జోషి దీన్ని "భూస్వామ్య మనస్తత్వానికి" నిదర్శనమన్నారు.

ఉత్తరప్రదేశ్‌లో అయితే ఈ టవల్ సంప్రదాయంలోనూ ఓ శ్రేణి ఉంది. అక్కడ వారానికి రెండుసార్లు టవల్స్ మారుస్తారు. సమావేశాల్లో తమకు టవల్స్ ఉన్న కుర్చీలు ఇవ్వడం లేదని కొందరు ప్రజాప్రతినిధులు ఫిర్యాదు చేయడంతో ప్రభుత్వం ఆదేశాలు జారీ చేయాల్సి వచ్చింది. సీఎం యోగి ఆదిత్యనాథ్ మాత్రం తన కుర్చీపై కాషాయ రంగు టవల్ వినియోగిస్తున్నారు. వలసవాద పాలన అవశేషాలను వదిలించుకోవాలని ప్రభుత్వం చెబుతున్నప్పటికీ, అధికార హోదాకు చిహ్నాలైన ఇలాంటి సంప్రదాయాలు మాత్రం నేటికీ కొనసాగుతూనే ఉన్నాయి.